अकोला : अयोध्या येथील प्रभू श्रीरामाचे मंदिर भाविकांसाठी २२ जानेवारीपासून खुले होत आहे. रामभक्तांना रामलल्लांचे दर्शन घेता यावे, यासाठी अमरावती रेल्वेस्थानकावरून दर्शननगर अयोध्या आस्था रेल्वेची विशेष रेल्वेगाडीच्या दोन फेऱ्या सोडण्यात येणार आहेत. त्यामुळें अकोल्यातील प्रवाश्यांना आयोध्येला जाण्यासाठी अमरावतीला जावे लागणार आहे. मध्य रेल्वेने अमरावती रेल्वे स्थानकावरून ७ व २५ फेब्रुवारीला दर्शननगर अयोध्या आस्था रेल्वेची सोय केली आहे. ही रेल्वे ९ व २७ फेब्रुवारीला अयोध्येहून परत निघेल. त्यामुळे कोणत्याही अडचणीशिवाय प्रवाशांना थेट अयोध्येला जाणे व दर्शन घेतल्यानंतर परत येणे शक्य होणार आहे.
जास्तीत जास्त भाविकांनी रामलल्लांचे दर्शन घेता यावे यासाठी रेल्वेने देशभरातील विविध ठिकाणांहून अयोध्येसाठी आस्था विशेष रेल्वेगाड्या सुरू केल्या आहेत. अमरावतीतूनही अयोध्येसाठी रेल्वे गाडी सोडावी, अशी मागणी होती. त्यानंतर आस्था रेल्वेच्या अमरावतीला दोन फेऱ्या मिळाल्या आहेत. या गाडीचे बुकिंग फक्त आयआरसीटीसी मार्फतच होणार आहे. तसेच भाविकांना रेल्वेत शाकाहारी जेवण दिले जाणार आहे.
नवी अमरावती (अकोली) रेल्वे स्थानकापासून अयोध्येतील दर्शननगर रेल्वे स्टेशन हे अंतर १४५२ किमी. असून २६ तास ५० मिनिटांचा हा प्रवास आहे. नवी अमरावती रेल्वे स्थानकावरून पहाटे ५.१५ वाजता ही गाडी प्रस्थान करेल. मार्गात वर्धा, नागपूर, काटोल, नरखेड, पांढुर्णा व इतर स्टेशनवरून पुढे जात सकाळी ८.०५ वाजता दर्शननगर अयोध्या येथे पोहोचेल. परतीचा प्रवास हा २७ तास १० मिनिटांचा आहे. दर्शननगर अयोध्या येथून ही गाडी सायंकाळी ६.५० वाजता नवी अमरावतीकडे निघेल व दुसऱ्या दिवशी रात्री १० वाजता पोहोचेल. या गाडीला एकूण २२ डबे असून, त्यात २० स्लीपर कोच तर दोन गार्डचे कोच राहणार आहेत. ७ फेब्रुवारीला खासदार नवनीत राणा, खासदार डॉ. अनिल बोंडे हे रेल्वेगाडीला हिरवी झेंडी दाखवतील. या गाडीमध्ये राम भक्तांची सोय झाली आहे. मात्र अयोध्येला जाण्यासाठी पहिल्यांदा अमरावतीला पोहचावे लागणार आहे.