आरक्षणाबाबतचा निर्णय होईपर्यंत मराठा समाजाला ओबीसींना दिले जाणारे अधिकार आणि सवलती दिल्या जातील असं मुख्यमंत्री एकनाथ शिंदे यांनी नवी मुंबईत जाहीर केलं. मराठा आरक्षणासाठी आंदोलन करणाऱ्या मनोज जरांगे पाटील यांच्या मागण्या मान्य केल्या असल्याचं त्यांनी आज वाशी इथल्या छत्रपती शिवाजी महाराज चौकात आंदेलनस्थळी सांगितलं. मराठा क्रांती मोर्चा आणि सकल मराठा समाजाच्या वतीनं यावेळी विजयोत्सव साजरा करण्यात आला त्यावेळी ते बोलत होते. मुख्यमंत्र्यांनी जरांगे पाटील यांना नव्या शासन निर्णयाची प्रत दिली आणि मुख्यामंत्र्यांच्या हातून फळांचा रस घेऊन जरांगे यांनी उपोषण मागे घेतलं.
महाराष्ट्रात मराठा समाजात ५४ लाख कुणबी नोंदी सापडल्या आहेत, त्यांच्या सगेसोयऱ्यांना कुणबी प्रमाणपत्र देण्यात यावं हा जीआर काढल्याबद्दल मनोज जरांगे पाटील यांनी सरकारचे आभार मानले आणि हा आदेश कायमस्वरूपी रहावा अशी अपेक्षा त्यांनी व्यक्त केली. अन्यथा आझाद मैदानावर उपोषणाला बसण्याचा इशारा असल्याचं जरांगे पाटील यांनी दिला. तत्पूर्वी, मनोज जरांगे पाटील आणि मुख्यमंत्री एकनाथ शिंदे यांनी वाशी इथल्या छत्रपती शिवाजी महाराज चौकात छत्रपती शिवरायांच्या अश्वारूढ पुतळ्याला पुष्पहार अर्पण करून अभिवादन केलं.
About The Author
