पॉलिटेक्निक व इंजिनिअरींगच्या परीक्षा आता मराठीतूनही देता येणार

डॉ. आंबेडकर तंत्रशास्त्र विद्यापीठ कायद्यात सुधारणा

मुंबई: राज्यातील पॉलिटेक्निक व इंजिनिअरींगमध्ये शिकणाऱ्या विद्यार्थ्यांना आता इंग्रजीबरोबरच मराठी भाषेतही परीक्षेचा पेपर लिहिता येणार आहे. यासंदर्भात गुरुवारी विधानपरिषदेत डॉ. बाबासाहेब आंबेडकर तंत्रशास्त्र विद्यापीठ कायद्यात सुधारणा करणारे विधेयक मंजूर करण्यात आले.

पॉलिटेक्निक व इंजिनिअरिंगच्या विद्यार्थ्यांना इंग्रजी बरोबरच मराठीतही परीक्षेचे पेपर लिहीता यावेत, यासाठी विधानसभेने मंजूर केलेले डॉ. बाबासाहेब आंबेडकर तंत्रशास्त्र विद्यापीठ सुधारणा विधेयक गुरुवारी विधानपरिषेत सादर करण्यात आले. उच्च व तंत्रशिक्षण मंत्री चंद्रकांत पाटील यांनी हे विधेयक मांडले.

या सुधारीत विधेयकामुळे या विद्यापीठात अभ्यासक्रम मराठीतून उपलब्ध होणार आहे. विधेयकाचा हेतू स्पष्ट करताना मंत्री पाटील म्हणाले, २०२० साली पंतप्रधान नरेंद्र मोदी यांनी नवीन शैक्षणिक धोरण घोषित केले. या धोरणात मातृभाषेला प्राधान्य देण्यात आले आहे. त्याप्रमाणे महाराष्ट्रातील पॉलिटेक्निक व इंजिनिअरींग या दोन्ही वर्गाची सर्व पुस्तके मराठीतून प्रसिद्ध करण्यात आली. मात्र लोणेरे येथील डॉ. बाबासाहेब आंबेडकर तंत्रशास्त्र विद्यापीठाच्या कायद्यामध्ये केवळ इंग्रजीचाच समावेश आहे. त्याऐवजी विधेयकात आता इंग्रजी व मराठी असा बदल केला आहे. तसेच सहा प्रश्नपत्रिकेपैकी चार मराठीत व दोन इंग्रजीमध्ये लिहिले तरी चालेल. पण हे ऐच्छिक असणार असून, त्यासाठी कायद्यात तरतूद करण्यात आली आहे, असे पाटील यांनी स्पष्ट केले. दरम्यान येत्या शैक्षणिक वर्षांपासून पदवी चार वर्षांची केली जाणार असून ती पूर्ण करण्यासाठीचा कालावधी ऐच्छिक असणार आहे, असेही त्यांनी सांगितले.

विद्यापीठांना देणार सॉफ्टवेअर

• केंद्र सरकारच्या नव्या धोरणानुसार मराठीतून शिक्षण देण्यासाठी मुंबईच्या आयआयटीने कृत्रिम बुद्धीमत्तेवर आधारीत सॉफ्टवेअर विकसित केले असून, हे सॉफ्टवेअर सर्व विद्यापीठांना देण्यात येणार असल्याचे मंत्री चंद्रकांत पाटील यांनी सांगितले. सॉफ्टवेअरमुळे शिक्षकांनी कोणत्याही भाषेतून शिकवले तरी विद्यार्थ्याला मातृभाषेत समजेल असे हे सॉफ्टवेअर असल्याचे त्यांनी सांगितले. या सॉफ्टवेअरचा अत्यंत चांगला उपयोग होईल, अशी अपेक्षा त्यांनी व्यक्त केली.