अकोला महानगरपालिकेच्या आगामी निवडणुकीसाठी उमेदवारी अर्ज भरण्याची प्रक्रिया 23 डिसेंबरपासून सुरू होत असून, त्यामुळे शहरातील राजकीय वातावरण तापू लागले आहे. राज्यातील २९ महानगरपालिकांप्रमाणेच अकोला महापालिकेची निवडणूकही ठरलेल्या वेळापत्रकानुसार पार पडणार आहे.
निवडणूक निर्णय अधिकाऱ्यांकडून मिळालेल्या माहितीनुसार, उमेदवारांना ३० डिसेंबरपर्यंत अर्ज दाखल करता येणार आहेत. दाखल झालेल्या अर्जांची छाननी ३१ डिसेंबर रोजी होणार असून, उमेदवारांना २ जानेवारीपर्यंत अर्ज मागे घेण्याची संधी दिली जाणार आहे. ३ जानेवारी रोजी निवडणूक चिन्हांचे वाटप करण्यात येईल तसेच अंतिम उमेदवारांची यादी प्रसिद्ध केली जाईल.
अकोला महानगरपालिकेसाठी १५ जानेवारी रोजी मतदान होणार असून, १६ जानेवारी रोजी मतमोजणी केली जाईल. या निवडणुकीत शहराच्या विकासाशी संबंधित अनेक महत्त्वाचे मुद्दे केंद्रस्थानी राहण्याची शक्यता आहे. पाणीपुरवठा, रस्त्यांची अवस्था, स्वच्छता, कचरा व्यवस्थापन, आरोग्य सेवा आणि स्मार्ट सिटीसंबंधी कामे हे प्रमुख प्रचाराचे मुद्दे ठरण्याची चिन्हे आहेत.
दरम्यान, प्रमुख राजकीय पक्षांनी निवडणुकीच्या तयारीला जोरदार सुरुवात केली आहे. इच्छुक उमेदवारांनी पक्षांकडे उमेदवारीसाठी अर्ज केले असून, अंतर्गत बैठका आणि मतदारसंघनिहाय आढावा घेतला जात आहे. काही प्रभागांमध्ये अपक्ष उमेदवारही निवडणूक रिंगणात उतरण्याची शक्यता व्यक्त केली जात आहे.
निवडणूक शांततेत व पारदर्शक पद्धतीने पार पडावी यासाठी प्रशासनाकडूनही तयारी सुरू आहे. आदर्श आचारसंहिता लागू होण्याची शक्यता असून, कायदा व सुव्यवस्थेच्या दृष्टीने पोलिस यंत्रणाही सज्ज ठेवण्यात आली आहे.
एकूणच, अकोला महानगरपालिकेच्या निवडणुकीकडे शहरवासीयांचे लक्ष लागले असून, आगामी पाच वर्षांसाठी शहराच्या कारभाराची दिशा ठरवणारी ही निवडणूक महत्त्वाची ठरणार आहे.
About The Author
