धनादेश होणार काही तासांत क्लीअर; रिझर्व्ह बँकेची मोठी घोषणा

मुंबई : आता तुम्हाला चेक क्लिअरन्ससाठी जास्त वेळ थांबावे लागणार नाही. होय, आता काही तासांतच तुमचा चेक क्लिअर होईल आणि तुमच्या बँक खात्यात पैसे हस्तांतरित केले जातील. भारतीय रिझर्व्ह बँकेने चेक क्लिअरिंगसाठी लागणारा वेळ काही तासांवर आणण्यासाठी आणि त्याच्याशी संबंधित जोखीम कमी करण्याच्या उद्देशाने पावले उचलण्याचा निर्णय घेतला आहे.

सध्या धनादेश जमा झाल्यापासून रक्कम येईपर्यंत दोन दिवस लागतात. मात्र, नव्या प्रणालीमध्ये धनादेश जमा झाल्यानंतर काही तासांतच ‘क्लीअर’ होणार आहे. चेक क्लिअरिंग सुलभ करणे, सेटलमेंट जोखीम कमी करणे आणि ग्राहकांना चांगली सेवा प्रदान करण्याच्या उद्देशाने, चेक ट्रंकेशन सिस्टमची सध्याची प्रक्रिया बदलण्याचा प्रस्ताव असल्याचे रिझर्व्ह बँकेचे गव्हर्नर शक्तिकांत दास यांनी चालू आर्थिक वर्षाच्या तिसऱ्या पतधोरण आढाव्याची घोषणा करताना सांगितले. सध्याच्या सीटीएस प्रणाली अंतर्गत ‘बॅचेस’ मध्ये प्रक्रिया करण्याऐवजी, कामकाजाच्या वेळेत सतत क्लीअरिंग केले जाईल. चेक ‘स्कॅन’ होणार नवीन प्रणाली अंतर्गत, चेक ‘स्कॅन’ केला जाईल, काही तासांत सादर केला जाईल आणि क्लीअर केला जाईल. याचा परिणाम काही तासांत चेक क्लीअरिंग होईल, तर सध्या यास दोन दिवस लागतात. यासंदर्भात सविस्तर मार्गदर्शक तत्त्वे लवकरच जारी करण्यात येतील, असे दास यांनी सांगितले.