आंध्र प्रदेशातील तिरुपती मंदिराच्या प्रसादात (लाडू) प्राण्यांची चरबी आणि माशांचे तेल वापरण्यात आल्याचे समोर आल्यानंतर देशभरात राजकीय खळबळ उडाली आहे. या प्रकरणावर प्रत्येकजण प्रश्न उपस्थित करत आहे. प्रसादात भेसळ करून हिंदूंच्या श्रद्धेला तडा गेल्याचा आरोप केला जात आहे. मात्र, तिरुपती मंदिराच्या प्रसादामुळे वाद निर्माण होण्याची ही पहिलीच वेळ नाही. 40 वर्षांपूर्वीही असेच प्रश्न उपस्थित झाले होते.
मीडिया रिपोर्ट्सनुसार, 80 च्या दशकात मंदिराच्या प्रसादाच्या गुणवत्तेबाबत प्रश्न उपस्थित झाले होते. एका निवृत्त अधिकाऱ्याने दावा केला होता की त्यांनी तिरुपती मंदिरातून घेतलेले लाडू बुरशीचे आणि दूषित असल्याचे आढळले होते. अधिकाऱ्याच्या या आरोपानंतर या प्रकरणाला वेग आला आणि हा वाद आंध्र प्रदेश विधानसभेपर्यंत पोहोचला.
प्रसादाचा दर्जा घसरल्याबाबत प्रश्न उपस्थित करण्यात आले आणि त्यानंतर चौकशीही करण्यात आली. वृत्तानुसार, या संदर्भातील एक अहवाल 1985 मध्येही समोर आला होता. यानंतर तत्कालीन मुख्यमंत्री एनटी रामाराव यांनी कारवाई करत अनेक कर्मचाऱ्यांना कामावरून काढून टाकले होते. तसेच प्रसाद बनवण्यासाठी शास्त्रीय पद्धतीचा वापर करण्यास मान्यता देण्यात आली. मात्र, नव्या वादाने 300 वर्ष जुन्या तिरुपती प्रसादच्या गोडव्यात कटुता वाढवली आहे.
तिरुपती व्यंकटेश्वर मंदिर आंध्र प्रदेशातील तिरुपती जिल्ह्यातील तिरुमला या डोंगराळ शहरामध्ये आहे. हे मंदिर भगवान विष्णूचे एक रूप भगवान व्यंकटेश्वराला समर्पित आहे. असे मानले जाते की तो मानवजातीला संकटांपासून वाचवण्यासाठी पृथ्वीवर प्रकट झाला. म्हणून या स्थानाला कलियुग वैकुंठ असेही म्हणतात.
या मंदिराला तिरुमला मंदिर, तिरुपती मंदिर आणि तिरुपती बालाजी मंदिर अशा इतर नावांनी देखील संबोधले जाते. मंदिर तिरुमला तिरुपती देवस्थानम (TTD) द्वारे चालवले जाते, जे आंध्र प्रदेश सरकारच्या अखत्यारीत येते. तिरुपतीचा इतिहासही शतकानुशतके जुना आहे, परंतु याविषयीही इतिहासकारांमध्ये अनेक मतमतांतरे आहेत. या मंदिराच्या उभारणीत चोल, होयसाळ आणि विजयनगरच्या राजांनी विशेष योगदान दिल्याचे सांगितले जाते. या मंदिरातील प्रसादाचा इतिहासही 300 वर्षांचा असल्याचे सांगितले जाते. मीडिया रिपोर्ट्सनुसार, मंदिरात प्रसाद बनवण्याची प्रथा 1715 च्या सुमारास सुरू झाली, ज्याला 2014 मध्ये जय टॅग देखील देण्यात आला.
About The Author
